李國章爆馬斐森任內受壓內幕 學侵侵大呼：「Fake News！」

　　香港大學校委會主席李國章一向都係風雲人物，今日佢就去咗劉慧卿（卿姐）個網台節目，佢喺節目開始之前就申報自己有啲傷風，卿姐講笑就話人哋以為佢做到喊呀！睇嚟卿姐都知道李國章喺網民之間唔算太受歡迎，所以就話希望今集節目啲嬲嬲唔好高到上鼻哥啦！

馬斐森受壓係「Fake News」？

　　不過今日李主席就好似心情幾好，卿姐叫佢將電話較靜音，佢即刻乖乖喺褲袋拎部電話出嚟較靜音。李主席仲同卿姐話當年，又話自己唔係建制派，係「反政府」添！不過佢一嚟就喺傳媒堆到搵大公、文匯同商報嘅記者，真係耐人尋味！然後聽到有SCMP嘅記者，隨即就笑笑口咁話：「我陣間要同你傾傾，Fake News！」

　　Fake News（假新聞）咁大件事？！究竟李主席葫蘆入面賣咩藥呢？原來係之前啱卸任嘅港大校長馬斐森接受SCMP訪問，話中聯辦經常(All the Time)向他提意見，被人質疑係干預。李主席就覺得「干預」係好大件事，校長又冇同佢提過，所以即刻Send信息畀校長，喺呢個時候李主席仲拎出佢個電話，大爆佢同校長當日嘅對話出嚟！

再爆中聯辦成日搵人「飯聚」

　原來馬斐森解釋話，當時記者問他是否經常處於壓力之下，他就答：「經常(All the Time)！」然後記者再問中聯辦有冇揾佢傾過，他話：「有」，結果報道出嚟之後，將兩條問題混淆咗。馬斐森又喺訊息強調，從來冇話受影響，只係話對方有畀「Advice（意見）」。

　　李主席仲大爆，其實中聯辦都成日搵人食飯，一年都有揾佢食兩、三次飯，講吓天氣咁，唔覺得係干預喎！仲估中聯辦都會去揾中大、科大、理大去「溝通」啦！

　　話晒李主席都係行會成員，卿姐梗係都要問吓佢對新任律政司司長鄭若驊嘅僭建風波有咩睇法喇！問到去信唔信好似林鄭所講，司長係同佢同一時間知僭建事件？李主席就講咗句好玄嘅說話：「應該信佢嘅，除非佢講大話啦！」Jenny聽完就覺得，to信or not to信，呢個仍然係一個Question、干預or冇干預，亦都仲係一個Question⋯⋯